Home Urdu Articles Religion Articles
Shirk Ki Haqeeqat (Shamim Ahmed, Karachi)
!
Quran Voh Kitab Hay Jis May Shuk Ki Koi Gunjaish Nahi. Quran Wajeh Daleel Or Noor Hay, Quran Shifa Hay, Quran Pichli Kitabo Ki Tasdeeq Karta Hay, Quran-E-Pak Nay Hamesha Ghor O Fikr Karnay Ki Dawat Di Or Isay Hamesha ALLAH Ki Taraf Rujo Lanay Ki Targheeb Dilai Laikin Her Parhnay Wala Or Quran-E-Pak May Sat Hai Nazar Karnay Wala Ye Na Samjhay Kay Quran-E-Pak Ki Tilawat Karnay Walay Tamam Hi Afrad Maqsad Ko Palain Gay. Nahi Hergiz Nahi Bulkay Quran-E-Pak Nay Khud Is Ki Tardeed Ki Bohat Say Log Is Quran Say Gumrah Ho Jatay Hain Or Bohat Say Is Say Hidayat Paatay Hain.(Surah Baqra:26) Sawal Ye Paida Hota Hay Bohat Say Log Quran Parh Kar Gumrah Kiyo Hojatay Hian? Is Ka Jawab Mufassareen Nay Ye Biyan Kiya Kay Who Quran-E-Kareem Parhtay To Hain Per Unka Dil Quran Kay Noor Say Munawwar Nahi Hota Voh Quran Ki AAYAT Ka Ghalt Tarjama Or Ghalat Mafhoom Samjh Laitay Hain, Ghalat Maanay Or Ghalat Mafhoom Samjhnay Ki Waja Say Who Gumrah Ho Jatay Hain. Chnachay Aisa Hi Aik Groh Guzra Jis Nay Quran-E-Kareem Ki Aik Aayat Per Nzar Kartay Hoay Dosri Aayat Ka Inkar Kar Diya, Is Groh Kay Tafseeli Halaat BUKHARI, MUSLIM Or IBN-E-MAJAH Or Deegar Ahadees Ki Kitabon May Mojood Hay Or Iskay Ilawa Allama Imam Abdul Rehman Bin Jozi Al-Baghdadi AlRehman Jinka Wisal 597 Hijri May Hoa Unho Nay 800 Saal Pehlay Apni Kitab TALBEES-E-IBLEES May Bhi In Khaarjiyon Kay Baray May Tafseelun Likha Hay. Khaarji Who Log Thay Jo Kalma Bhi Parhtay Thay, Quraan Ki Bhi Tilawat Kartay Thay, Ibadat Bhi Kartay Thay Bulk Ay Isqadar Shiddat Kay Saath Allah Ki Ibadat Kartay Thay Kay ABDULLAH BIN ABBAS Nay Farmaya May Nay In Say Barh Kar Ibadat May Koshish Karnay Wali Koi Qoam Nahi Dekhi, Sajdon Ki Kasrat Ki Waja Say In Ki Peshaniyo Per Zakham Parh Gayethay Laikin Quaran-E-Majeed Furqan-E-Hameed Ghalat Samjhnay Ki Waja Say Ye Aisay Gumrah Hoaye Kay Inho Nay Hazrat Ali (Radiallaho Tala Anho) Or Tamam Sahaba-EKaram Per SHIRK Ka Ilzaam Laga Diya Or Who Kehnay Lagay Kay Hazrat Ali (Radiallaho Tala Anho) Islam Say Kharij Hain (Naaoozobillaheminzalik) Voh Jis Aayat Ko Bunyaad Bana Rahay Thay Who Quaran-E-Majeed Furqan-E-Hameed Ki Aayat Ye Hay “Faisla Karnay Wala To Sirf ALLAH Hay”, Hazrat Ali (Radiallaho Tala Anho) Nay Aik Jhagray Ko Khatam Karnay Kay Liye Faisla Karnay Kay Liye Kisi Ko Faisla Karnay Wala Muqarrar Kiya To Ye Khaarji Kehnay Lagay “Faisla Karnay Wala To Sirf ALLAH Hay” Halan Kay Is Aayat Ka Ye Matlab Nahi, Is Aayat Ka Ye Matlab Hay Kay “Haqeeqi Tor Per Faisla Karnay Wala ALLAH TALA Ha, Haqeeqi Hakam Wahi Hay Or Jo Shakhs Faisla Karay Insano May Say Usay Chahiye Kay Quran-O-Hadees Kay Mutabiq Faisla Karay, Haqeeqi Faisla Karnay Ka Ikhtiyar ALLAH Ko Ha” Liakin Who Na Samjh Sakay To Hazrat Ali Nay Abdullah Bin Abbas Ko Bhaija To Hazrat Abdullah Bin Abbas Nay Un Khaarjiyo Say Kaha Jo Bazahir Kalma Bhi Parhtay Thay Or Quran Ki Tilawat Bhi Kartay Thay, Fermaya “Agar May Tumhay Quran Say Sabit Kar Doon Kay Insano May Say Faisla Karnay Wala Muqarrar Kiya Ja Sakta Hay To Kiya Tum Apni Baat Say Rujoo Kar Lo Gay?” To Kehnay Lagay “ Han Hum Kar Laingay” To Hazrat Abudllah Bin Abbas Nay Surah Nisa: Ayat #35 Ki Tilawat Farmai “ Jab Mian Bewi Kay Darmiyan Jhagra Ho Jaye Or Tum In Kay Darmiyan Sulah Karna Chaho To Aik Hakam Faisla Karnay Wala Shohar Ki Taraf Say Muqarrar Ho Or Doosra Hakam Faisla Karnay Wala Bewi Ki Taraf Say Muqarrar Ho” Hazrat Abdullah Bin Abbas Nay Farmaya “Aye Kharjiyo Zara Socho Kay Rabul Alemeen 2 Faisala Karnay Walay Muqarrar Farma Raha Hay, To Agar Allah Kay Siwa Kisi Or Ko Faisla Karnay Wala Muqarrar Karna Shirk Hota To Kabhi Quran Shirk Ki Dawat Na Deta, Or Waha Muraad Hay Kay Haqeeqi Faisla Karnay Wala Sirf Allah Hay”, Kitna Piyara Andaz Tha Magar Afsos Kharjioy Ki Aksaryat Apni Zid Per Qaim Rahi Sirf Chand Kharji Aisay Thay Jinho Nay Toba Ki (Wama Tofiqi Illah Billah – Tofeeq To Denay Wala Sirf Allah Hay). In Tamam Bato Sya Ye Pata Chala Kay Agar Quran-E-Pak Ka Ghalat Mafhoom Lay Liya Jaye To Basa Oqaat Kitni Ghalat Rah Per Voh Chala Jata Hay, Kay Voh Qoam Ibadat Bhi Kar Rahi Hay Magar Hazrat Ali Or Sahaba Ko Mushrik Samjh Kar Khud Daira-E-Islam Say Kharij Ho Rahi Hay, Unki Ibadatain Zaya Horahi Hayn, Aisi Quran-E-Majeed Furqan-EHameed May Kai Misalain Hain Bazahir Aik Aayat Ka Ghalat Matlab Samjh Liya Jaye To Dosri Aayat Takrati Hoi Mehsoos Hotai Hay Or Haqeeqat Ye Hay Kay Quran Ki Aaytain Aapas May Takrati Nahi Hain, Agar Mafhoom Ghalat Liya Jaye To Iski Waja Say Insan Ghalat Fehmi Ka Shikaar Ho Jata Hay Maslan Quran-E-Majeed Furqan-E-Hameed May Irshad Farmaya Gaya (Surah Toba:129) “Farmadijye Meray Liye Allah Kaafi Hay” Ab Agar Koi Is Ka Ye Mafhoom Lay Kay Allah Kafi Hay Or Iskay Siwa Kisi Or Ko Kafi Kehna Shirk Hay To Quran-E-Majeed Furqan-E-Hameed Per Aitraaz Waaqe Hota Hay (Surah Anfal:64) “A Nabi Aapko Allah Bhi Kafi Hay Or Aapki Pairvi Karnay Walay Naik Salah Momeneen Bhi Aapko Kafi Hain”. Sawal Ye Hay Kay Jab Allah Kafi Hay To Kisi Or Ki Kiya Hajat, To Iska Jawab Mufassareen Nay Bara Piyar Diya Hay Kay Jab Ye Kaha Jaye Kay Allah Kafi Hay To Is Say Muraad Ye Liya Jaye Ga Kay Haqeeqi Tor Per Sub Kuch Denay Wala Allah Hi Hay Or Jahan Ye Kaha Jaye Ga Kay Naik Momeneen Kafi Hain To Us Say Muraad Ye Hay Kay WHO ALLAH KI ATA SAY KAFI HAIN. Isi Tarha Aisi Or Bhi Mislain Hain, Missal Kay Tor Per Allah Tala Say Sub Kuch Honay Ka Yaqeen Or GHAIRULLAH Say Kuch Na Honay Ka Yaqeen Hona Chahiye, Basa Oqaat Ye Jumla Kaha Jata Hay, Yaqeenun Bila Shubah Tamam Kaam Ko Bananay Wali Zaat To ALLAH Hi Ki Hay , Uski Mashiyat Kay Baghair To Aik Zarrah Bhi Harkat Nahi Kar Sakta Laikin In Sari Ghufatago Say Agar Ye Koshish Ki Jaye Kay 2 Jahan Kay Sardar Ko Be-Ikhtiyar Sabit Karnay Ki Koshish Ho Or Ye Taswoor Dainay Ki Koshish Ho Kay Huzoor Na Kuch Kar Saktay Hain Na Kuch Day Saktay Hain Allah Ki Aata Say Bhi Nahi Day Saktay, Agar Ye Nazarya Ho To Mazallah Summa Mazallah To Quran Ki Kai Aayaton Or Hadees-E-Tayabba Ka Inkar O Jaye, Aik Choti Si Missal Paish Karnay Ki Ijazat Chahoonga Kay BUKHARI, MUSLIM Or Deegar Ahadees Ki Kitabo May Tafseelun Mojood Hay Kay "Maidan-E-Mehshar May Log Nijaat Kay Liye Ambiya Kay Paas Jain Gay To Ambiya Farmaingay JAO KISI OR KAY PAAS Or Phir Jab Log Huzoor Ki Khidmat May Aaingay To Pyaray Aqa Farmain Gay MAY HI TUMHARI SHIFAYAT KARON GA” To Agar Ye Aqeda Rakh Liya Jaye Kay Allah Ki Di Hoi Taqat Say Bhi Nabi Kareem Kuch Nahi Kar Saktay To Ye Quraan Ki Kai Aayto Ka Bhi Inkaar Hay Or Ahadees Ka Bhi Inkar Hay. Kharji Qoam Jis Ghalatfehmi Ka Shikaar Hoi Voh Ye Thi Kay Unho Nay Ye Samajh Liya Kay Hazrat Ali Or Sahaba-E-Karam Mushrik Hain Or Haqeeqat Ye Hay Kay Unho Nay SHIRK Ko Samjha Nahi Kay Shirk Kisay Kehtay Hain? Asal May Shirk Ki 3 Qismain Hoti Hain SHIRK FIL IBADAT, SHIRK FIZ ZAT Or SHIRK FIS SIFAAT. Shirk Fil Ibadat Ye Hay Kay Allah Kay Ilawa Kisi Or Ko Ibadat Kay Laaiq Samjha Jaye Jaisay Mushrikeen-E-Makkah Jinho Nay Khana-E-Kaba May 360 But Rakhay Thay Or Unki Voh Pooja Kartay Thay Jabkay ALLAH KAY SIWA KOI IBADAT KAY LAAIQ HI NAHI HAY. Shirk Fiz Zaat Ye Hay Kay Ye Tasawwor Kiya Jaye Kay Khaliq-E-Kainaat Rabbul Alemeen Ki 2 Zaat Hay Aisa Tasawwor Shirk Fiz Zaat Hay. Alhamdolillah Muslmaan Na Shirk Fil Ibadat May Mubtila Hain Or Na Hi Shirk Fiz Zaat May Mubtila Hain. Teesri Qisim Hay Shirk Fis Sifaat Jisay Samjhna Behad Zaroori Hay Iski Tareef Yon Beyaan Hoi Hay Kay Jo Allah Tala Ki Sifaat Hain Unkay Barabar Kisi Or Ki Sifaat Tasawwor Karna Ye Shirk Fis Sifaat Hay. Shirk Fis Sifaat Ko Na Samjhnay Ki Waja Say Kai Log Allah Ki Ibadat Karnay Kay Bawajood Gumrah Ho Gaye. (Surah Baqra:143) “Beshuk Allah Tala Logon Per Rauf Or Raheem Hai” Allah Rauf Bhi Hay Or Raheem Bhi Hay. Quran-E-Majeed Furqan-E-Hameed May Dosray Muqaam Per Fermaya (Surah Toba:128) “Beshak Tumharay Paas Tumhi May Say Voh Rasool Tashreef Laye, Jin Per Tumhara Mushaqqat May Parna Bhaari Hay, Tumhari Bhalai Ko Bohat Chahnay Walay Hain, Momino Per Rauf Or Raheem Hain” Aik Taraf Farmaya Jaraha Hay Kay Allah Taala Rouf-Ur-Raheem Hain Or Dosri Taraf Farmaya Ja Raha Hay Kay Rasool-EKareem Rouf-Ur-Raheem Hain To Zehan May Ye Sawal Paida Ho Ga Kay Shirk Fis Sifaat Naam Hay Baraberi Ka To Phir Ye To Sifaat Aik Jais Hoagie. Or Dono Quran Ki Aayatain Hain Or Quran To Shirk Say Door Karta Hay. Dilon Ko Shirk Say Pak Karta Hay, Mufassareen Any Bari Piyar Baat Irshad Farmai, Fermaya Kay Rauf-Ur-Raheem Allah Bhi Hain Or Huzoor Bhi Hain Laikin Barabri Nahi Hay Allah Ka Rauf-Ur-Raheem Hona Zaati Hay, Huzoor Ka Rauf-Ur-Raheem Hona Allah Ki Aata Say Hay, Allah Tala Hamesha Hamesha Say Rauf-Ur-Raheem Hay Or Huzoor Rauf-Ur-Raheem Hain Jab Say Allah Nay Unhain Ye Muqaam O Martaba Diya, Jab Ye Farq Ho Gaya To Barabri Na Rahi Or Shirk Lazim Na Aaya. Aik Or Misal Hazir-E-Khidmat Hay Quran-E-Majeed Furqan-E-Hameed May Irshad Hoa Hay : (Surah Namal:65) “Tum Farmado Jo Koi Aasman O Zameen May Hain Allah Kay Siwa Koi Ghaib Nahi Janta” Aik Taraf Farmaya Gaya K Allah Hi Ghaib Ka Ilm Janta Hay, Dosri Taraf Irshad Hoa: (Surah Jin:26-27) “Ghaib Ka Jannay Wala Rabul Alemeen Ghaib Ka Ilm Kisi Ko Nahi Daita Magar Apnay Rasoolon Ko Pasand Fermata Hay Or Unhain Ghaib Ka Ilm Ata Fermata Hay” Dono Aayatain Quran Ki Hain In Dono Aayaton Ka Mafhoom Mufassareen Nay Ye Bayan Kiya K “Haqeeqi Tor Per Ghaib Ka Ilm Jannay Wala Sirf Or Sirf Allah Hay, Allah Ki Ata Kay Baghair Koi Kuch Nahi Janta Or Jab Allah Tala Ata Farmaye To Mehboob-E-Kareem Allah Ki Ata Say Ilm-E-Ghaib Jantay Hain, Allah Bhi Ghaib Ka Ilm Janta Hay Or Rasoolullah Bhi Ghaib Ka Ilm Jantay Hain Laikin Barabari Nahi Hay Allah Tala Ka Ilm Zaati Hay, Huzoor Ka Ilm Allah Ki Ata Say Hay” Jab Farq Ho Gaya To Barabri Na Hoi. Quaran-E-Majeed Furqan-E-Hameed May Iski Aik Or Misal Bhi Di Ja Sakti Hay: (Surah Muhammad:11) “Muslmano Ka Mola Madadgar Allah Hay” Phir Dosri Jaga Farmaya (Surah Tahreem:4) “Beshuk Allah Unka Mola Hay Madadgar Hay, Or Jibreel Bhi Mola Madadgar Hain, Or Salah Momeneen Madadgar Hain Or Farishtay Bhi Mola Madadgar Hain” Sawal Ye Paida Hota Hay K Aik Taraf Irshad Ho Raha Hay Kay Allah Mola Madadgar Hay Or Dosri Taraf Farmaya Jar Aha Hay Kay Allah Bhi Madadgar Hay, Jibreel Bhi Madadgar Hain Or Naik Momeneen Bhi Madadgar Hain Or Farishtay Bhi Madadgar Hain, Jabkay Dono Aayatain Quran Ki Hain Koi Takrao Nahi, Samjhna Ye Hay K Allah Tala Mola Hay Madadgar Hay Haqeeqi Tor Pay Or Zaati Tor Per, Or Jibreel Or Naik Momeneen Madadgar Hain Allah Ki Ata Say, Allah Nay Apni Madad Ka Unhain Zarya Or Waseela Banaya. Quaran-E-Majeed Furqan-E-Hameed Ki Aik Or Aayat-E-Kareema Is Mafhoom Ko Wazahe Karti Hay, (Surah Maaida:55) “Tumharay Madadgar Hain Allah Or Uskay Rasool Or Eeman Walay” Allah Bhi Madadgar Hain, Rasool Bhi Madagar Hain Or Eeman Walay Bhi Madadgar Hain, Wahi Farq Hay Allah Haqeeqi Or Zaati Tor Per Madadgar Hay Or Huzoor Or Naik Saleh Momeneen Ki Madad Beiznillah Hay Allah Ki Ata Say, Allah Ki Inayat Say Or Allah Kay Karam Say, Haqeeqi Madadgar Sirf Allah Hay, Or Allah Kay Rasool Or Naik Momeneen Allah Ki Madad Kay Husool Ka Aik Zarya Hain Aik Waseela Hain. Yahan Per Aik Sawal Or Paida Hota Hay Kay Jab Ye Keh Diya Gaya K ALLAH TUMHARA MADADGAR HAY Or Isi Tarha Pichli Aayat May Ye Keh Diya Gaya Kay ALLAH HI UNKA MOLA HAY MADADGAR HAY To Jab Allah Ki Madad Ka Zikr Kar Diya Gaya To Phir Rasoolullah, Jibreel Or Naik Saleh Momeneen Ki Madad Ka Zikr Kiyo Kiya Gaya??? Kiya Allah Tala Ki Madad Nakafi Hay? Hergiz Ye Baat Nahi Asal Baat Ye Hay K Quran Ye Aqeeda Bayan Kar Raha Hay K Allah Tala Hi Madad Farmaye Ga Laikin Allah Tala Apnay Naik Bandon Ko Muqam, Martaba Or Bulandi Ata Fermata Hay Or Un Say Wabasta Rahain Gay Or Unki Bargah May Hazir Hongay To Allah Tala Karam Farmaye Ga Or Unkay Waseelay Say Hamara Bera Paar Farma Day Ga. Quran Ki Aaytain Pesh Ki Jarahi Hain Or In Aayaat Ka Maqsad Kiya Hay Kay Agar Aik Aayat Say Ghalat Mafhoom Lay Liya Jaye To Quran Ki Dosri Aayat Us Say Takra Jaye Halankay Quran May Koi Takrao Nahi Hay. (Surah Shoora:49) “Allah Jisay Chahay Betiyan Ata Farmaye Or Jisay Chahay Baitay Day” Or Dosray Muqam Per (Surah Maryam:19) Hazrat-E-Jibreel-E-Ameen Hazrat Maryam Kay Pass Aaye Or Jibreel-E-Ameen Nay Kiya Kaha? “Jibreel-E-Ameen Bolay: May To Sirf Teray Rub Ka Bhaija Hoa Qasid Hoon, May Is Liye Aaya Hoon Kay Tujhay Suthra Or Pakeeza Beta Ata Karoon” Aik Taraf Farmaya Gaya Kay Betay Or Betiyan Allah Hi Daita Hay Or Dosri Taraf Jibreel-EAmeen Keh Rahay Hain May Tujhay Naik, Saleh Beta Ata Karoon. Haqeeqi Tor Per Ata Karnay Wala Allah Hi Hay Or Jibreel Jo Ata Kar Rahay Hain Voh Allah Ki Ata Say Kar Rahay Hain. (Surah Zumar:42) “Allah Hi Jano Ko Mot Daita Hay” Zindagi Mot Dainay Wala Allah Hi Hay, (Surah Sajda:11) “Aap Fermaiy K Mot Kay Farishtay Hazrat Malakul Mot Tumhain Mot Dain Gay” Sawal Ye Hay K Hazrat Izraeel Alehassalam Mot Dain Gay Quran Ye Bayan Kar Raha Hay Or Aik Tarf Ye Kay Mot Denay Wala Allah Hay, Dono Aayaton May Koi Takrao Nahi, Samajhna Ye Hay Kay Haqeeqi Tor Per Mot Dainay Wala Allah Hi Hay Or Hazrat Izraeel Alehassalam Allah Ki Ata Say Ye Kaam Seranjam Daitay Hain. Zara Bataye Beemaro Ko Shifa Dainay Wala Kon? Allah. Murdon Ko Zinda Kon Karta Hay? Allah Karta Hay Laikin Hazrat Eesa Alehassalam Ailaan Ferma Rahay Hain (Surah Al-EImran:49) “May Beemaro Ko Shifa Daita Hoon, Maadarzaad Andho Ko Aankhain Daita Hoon, Bars Kay Mareezon Ko Shifa Daita Hoon, Or May Murdon Ko Zinda Karta Hoon, (Laikin Aap Khud Wazahat Farmarahy Hain) Beiznillah, Karta May Hon Per Allah Kay Hukum Say” To Jab Atai Or Zaati Ka Farq Ho Gaya To Barabri Na Hoi Or Jab Barabri Na Hoi To Shirk Na Hoa. Rasool-E-Pak Kay Zamanay May Munafiqeen Thay Munafiqeen Bhi In Cheezo Ko Na Samajh Sakay Or Unho Nay Itni Bari Jurrat Ki Kay Is Farq Ko Na Samjhnay Ki Waja Say Unho Nay Rasool-E-Pak Per Shirk Ka Ilzam Laga Diya Iski Tafseel Ka Mutala Karain Hazrta Allama Fakhruddin Raazi Ale Rehma Jinka Wisal 606 Hijri My Hoa Alam-E-Islam Kay Mashhoor Tareen Tafseer-E-Kabeer Jild#4, Page#150 Beroot Kay Nukhsay May Aap Nay Mufassil Bayan Fermaya Hay. Or Yeahi Tafseel Tafsser-E-Khazin, Jild#1, Page#405 May Bhi Mojood Hay. Yahan Per Ye Arz Karon Kay Allah Tala Apnay Naik Bando Ko Muqam Or Martabay Ki Bulandi Daita Hay, Unhain Taqat O Qudrat Daita Hay Iska Ye Matlab Hay Kay Beshuk Allah Her Chahat Per Qadir Hay. Voh Jisay Jo Muqam Or Martaba Dena Chahay Voh Day Sakta Hay. Allah Ki Qudrat Ko Mahdood Na Samjha Jaye. Allah Tala Nay Hazrat Suleman Alehissalam Ko Kaisi Hukoomat Di, Jinnaat Aapkay Taabay, Hawain Aapkay Taabay, Parindo Ki Boliyan Aap Suntay Or Samandar May Mojood Machliyon Say Aap Guftagoo Kartay, Ye Jo Aapko Muqam O Martaba Diya Gaya, Poori Dunya Ki Hukoomat Di Gai, Aap Hawaon May Urtay, Hawa Aapkay Taabay Thi, Ye Muqaam O Martaba Kis Nay Diya? Allah Nay Diya. Allah Apnay Bando Ko Jo Muqam O Martaba Day Banday Ko Chahiye Kay Allah Ki Qudrat Per Yaqeen Rakhay Or Voh Ye Kahay Kay Allah Tala Jo Chahay Kar Sakta Hay. (Bukhari: Jild#2, Page#963, Kitab-Ur-Riqaq, Baab Tawado, Hadees#6021) Hadees-E-Qudsi: Abu Huraira Say Merwi Hay Kay Huzoor Nay Irshad Fermaya: “Beshuk Allah Tala Fermata Hay Jo Mairay Wali Say Dushmani Rakhay Ga, Jo Meray Mehboob Banday Say Dusmani Rakhay Ga Us Kay Liye Mera Ailaan-E-Jung Hay” Mehboob Banday Say Dushmani Kay Kiya Maanay Hay?Mahboob Banday Kay Maqam Or Martabay Ko Ghatanay Ki Koshish Karna, Allah Nay Unhain Jo Maqam Diya Us Maqam Ko Tasleem Na Karna, Unki Izzat-O-Tazeem-O-Toqeer Musalmano Kay Dilon Say Nikalnay Ki Koshish Karna Ye Dushmani Hay. Or Farmaya “Mera Banda Qurb Hasil Karta Rehta Hay Yahan Tak Kay Voh Faraiz Kay Zarye Meri Baargah May Qurb Hasil Karta Hay Or Mera Banda Faraiz Kay Baad Nawafil Kay Zarye Mera Qurb Hasil Karta Hay Yahan Tak Kay May Usay Apna Mahboob Bana Laita Hoon, Or Jab May Usay Apna Mahboob Bana Laita Hoon To May Uskay Voh Kaan Ban Jata Hoon Jis Say Voh Sunta Hay, May Uski Voh Aankh Ban Jata Hoo Jis Say Voh Dekhta Hay, Or May Uskay Voh Haath Ban Jata Hoon Jis Say Voh Pakarta Hay, Or May Uskay Voh Paaon Ban Jata Hoon Jis Say Voh Chalta Hay Or Agar Mera Ye Maqbool Banda Mujh Say Koi Cheez Mangay, Sawal Karay, Dua Mangay To May Zaroor Ba Zaroor Uski Duaon Ko Qabool Fermata Hoon" Muafassir-E-Kabeer, Hazrta Allama Fakhruddin Raazi Ale Rehma Is Hadees-E-Qudsi Ki Tashreeh Farmatay Hain (Tafseer-E-Kabeer, Jild#7, Page# 436) “Jab Allah Ka Naik Banda Musalsal Ibadat Karta Rehta Hay Or Allah Ka Maqbool Ban Jata Hay Or Phir Voh Us Maqam Per Pohanch Jata Hay Kay Allah Fermata Hay May Uskay Kaan Ban Jata Hoon, May Uski Aankh Ban Jata Hoon, Iska Matlab Hay Kay Jab Allah Kay Jalal Ka Noor Uskay Kaan Ban Jata Hay To Voh Qareeb Ki Batain Bhi Sunta Hay Or Door Ki Batain Bhi Sunta Hay, Jab Allah Kay Jalal Ka Noor Uski Aankhain Ban Jata Hay To Voh Qareeb Ko Bhi Dekh Laita Hay Or Door Ko Bhi Dekhta Hay Or Jab Allah Kay Jalal Ka Noor Uskay Haath Ban Jata Hay To Allah Tala Usay Voh Taqat Daita Hay Kay Voh Qareeb Or Door, Asan Or Mushkil Voh Tamam Kamo Per Qudrat Rakhta Hay Or Voh Voh Karamatain Dikhata Hay Kay Aqalain Dung Reh Jati Hain" Imam Jalaluddin Saiyooti Nay Bhi Isi Qisim Ki Tashreeh Bayan Fermai Hay. Quaran-E-Majeed Furqan-E-Hameed May Bhi Allah Kay Naik Bando Ki Taqat Ka Zikr Hay, Mulka-E-Bilqees, Mulk-E-Saba Ki Malka Uska Voh Takht Jo 80 Gaz Lamba 40 Gaz Chora, Sonay Chandi Or Heeray Jawaheraat Say Saja Hoa, 2 Maheenay Ki Masafat Per Tha, 2 Maheenay Tak Ghora Dorta Rahy Tab Jakar Uskay Faslay Ko Teh Karay, Sakht Pehray May, 7 Kamron Kay Saath Taalon May Band Tha, Is Per Pehredaar Muqarrar Kiye Gaye, Hazrat Suleman Alehassalam Nay Apnay Darbariyon Say Farmaya, Malka-E-Bilqees Meray Pass Aarahi Hain, Unkay Aanay Say Pehlay Tum May Say Hay Koi Jo Meray Pass Unka Takhat Lay Kar Aaye? Quran Bayan Farma Raha Hay Kay Aik Taqatwar Jin Nay Kaha K May Lay Kar Aaon Ga. Aap Nay Fermaya Kab Lay Kar Aao Gay? Kehnay Laga Shaam Honay Say Pehlay Pehlay Lay Aaonga. Aap Nay Fermaya Ye To Takheer Ho Jaye Gi, Mujhay Is Say Bhi Pehlay Chahiye.(Surah Namal:40) “Kaha Us Banday (Asif Bin Barkhiya) Nay Jis Kay Paas Kitaab (Zaboor) Ka Ilm Tha, Kaha May Is Takht Ko Lay Kar Aaonga Aap Ki Palak Jhapaknay Say Pehlay” Hazrat Suleman Nay Kaha Lay Aao To Asif Bin Barkhiya Nay Forum Hi Takhat Ko Aapkay Samnay Hazir Kardiya. Ghor Talab Baat Ye Hay Kay Jab Hazrat Sulemaan Alehissalam Ka Ummati Jis Kay Pass Zaboor Ka Ilm Hay Uskay Pass Itni Taqat Hay To Allah Kay Mehboob Kay Kamil Waliyon May Kitni Taqat Hogi Jo Quran Ka Ilm Jantay Hoon Or Phir Sardarul Ambiya Ka To Kiya Hi Kehna. Hazrat Abu Bakar Siddiq Radi Allah O Tala Anhu Kay Dor-E-Khilafat May Naboowat Ka Jhoota Dawa Karnay Wala Musailma Kazzab Us Nay Sir Uthaya Iskay Saath 60 Hazar Foji Thay, Is Jung-E-Yamama May Muslmano Ki Tadad Bohat Kam Thi, Aik Mor Voh Aaya Kay Muslmaan Sakht Mushkil May Mubtila Hoaye Is Pareshani May Muslmano Kay Sipah Salaar Hazrat Khalid Bin Waleed Radi Allah O Tala Anhu Nay Huzoor Ko Madad Kay Liye Pukara, Ibn-E-Kaseer Jinhain Dunya Muhaqqiq Tasleem Karti Hay Al-Bidaya Wan-Nihaya, Jild#6, Page#24, Voh Likhtay Hain “Us Waqt In Sahab-E-Karam Ka Ye Shiaar Tha Kay Voh Huzoor Ko Madad Kay Liye Pukar Rahay Thay” Ab Mujhay Ye Bataye Kay Sahaba-E-Karaam Say Barh Kar Toheed Ko Samjhnay Wala Or Kon Ho Sakta Hay? Agar Kisi Ko Madad Kay Liye Pukarna Shirk Hota To Sahaba-E-Karam Hergiz Na Pukartay, Han Itna Arz Kardoon Kay Jab Hum Kisi Say Madad Mangtay Hain To Ye Aqeeda Honay Chahiye Unhain Jo Taqatain Hain Voh Allah Ki Ata Say Hain, Allah Ki Ijazat Say Madad Kartay Hain. Baat Bohat Lambi Hogai Hay Bus Itna Samjh Lain Kay Shirk Jab Ho Ga Kay Jab Hum Kisi Ki Sift Ko Ye Samjhain Kay Ye Uski Zaati Hay Allah Ki Ata Karda Nahi To Shirk Hay. (WALLAH ALAM BIS SAWAB) Allah Say Dua Hay Kay Allah Hamay Quran Ko Sahi Tor Per Samajhny Ki Tofeeq Ata Farmaye Or Is Mail May Koi Ghalti Ho Gai Hay To Mujhay Maaf Farmaye. (Ameen)
Rate it:
Email
22 Oct, 2010
Post Comments
Total Views: 5021
Print
Jahanum Ka Jaal Qadyani
NEXT
About the Author: Shamim Ahmed Read More Articles by Shamim Ahmed: 3 Articles with 6976 views » Currently, no details found about the author. If you are the author of this Article, Please update or create your Profile here >> Reviews & Comments
By: Shamim Ahmed, Karachi on Apr, 10 2013
Reply
0
Allah. Sahi kaha Quran phar k aksar log gumrah ho jaty hian. Allah k siwa kisi or se madad mangna shirk hay bohat bara shirk. Bahi sahab aap ny kaha k Quran mein hay k Allah faisla karay ga. Ye bat bilkul drust hy. Allah hi faisla karta hay. Misal k toor par agar eik shaqs ka adalat mein case ho jata wahan faisla judge karay ga. Magar wo judge sahi faisla karay is ka ikhtyar Allah ko hay. Yani agar Allah chahay ga to hi wo judge sahi faisla aap k haq mein karay ga. Or agar wo judge b iman par ho ga to wo yehi kahay ga k mery rab muj se sahi faisla karwa. Cz us ko ye dar ho ga k agar fasila galat kar dea to Allah pakar ly ga. Isi liay Iman walon ko In Sha Allah kheny ka kaha jata hay. K har bat k sath In Sha Allah kaho. Yani agar Allah chahay ga. Agar mein bemar ho jao to kia koi mujy us bemari se nijat dy ga. Har giz nae jitny marzi doctors k pas jao par shifa nae milay gi. Lakin Allah chahay ga to hi shifa milay gi ab wo kisi doctor k zariay dy ya hakeem k. Ye iman walon ka bhrosa hay Allah par. Mujy paiso ki zarorat hay to kia prophet PBUH mujy paisy dein gy? nae bahi Allah dy ga ab wo kis ko zariya banata hay ye wohi janta hay. Kam to sary Allah karta hay insan to sirf or sirf zariya hain. jab logon ko musebat parti hay to Pukarny lagty hian Khalis Allah ko or jab wo musebat door hoti hay to shreek banay lagty hian. Allah jis ki marzi se zameen or asman chal rahi hay aap khety ho us k siwa b or log hian jo madad kar sakty hian?......bolo kia banaya us ny jis ko aap Allah k siwa madad gar samjty ho? Kia agar aap se Allah apna rizq ly jaye jo aap ko khany ko dea hay to koi or hay jo aap ko rizq dy?.. Kia koi aisa insan hay jo Allah ka azab tal sakay ya Allah ki rehmat taal sakay. Aap log kam sochty ho. Qimat k roz kahay ga Allah pukaro mery shrekon ko jis ko tum pukarty thy Allah k siwa to log kahien gy Ae Allah wo hum se kho gaye. Eesa A.S ny murdy zinda kiay Allah k hukam se. Agar ALlah ka hukam na hota to wo kabhi na kar sakty. Allah ny aisa chaha tab hi unho ny murdy zinda kiay. Isi terha prophet Muhammad PBUH ny Quran sunaya wo b ALlah k hukam se agar Allah na chahta to kabhi wo kabhi prophet bannay k qabil na hoty. Har chez ka mukamal iqtdar Allah k hath mein hay. Kis k hukam se barish hoti hay? Kis k hukam se hawain chalti hain? Kia kisi prophet k hukam se hota hay ye sab? Lol. us se zalim kon jo logon ko Allah k rasty se roky. Kon hay jo din ko raat mein dakhil karta hay. Bahi sahab Allah hi hay jo har kam karta hay. Phr b log nae samjty. Allah ny kaha hay jin ko dea gaya hay kitab ka ilm wo janty hian. Mujy Allah ka fazal hy k kitab ka ilm dea gaya or ye Allah ki rehmat hay muj par. mein janta hon k Koi Allah k siwa madadgar nae or na koi dost. Or jis se aap Allah k siwa madad mangty ho wo to khud Allah k mohtaj hain wo bhala kia madad karien gy jis ko khud Allah ki madad ki zarorat ho. Kher Akhirat k roz Allah faisla karay ga jin baton mein log jhagarty hian. Wo sab kuch bata dy ga. Us din aap ko samaj aa jaye gi k kon bachata hay dozakh k azab se. Power sari Alllah ko hay. Jin logon ny prophet ki madad ki wo Allah k hukam se ki. Agar Allah na chahata to koi madad na karta. Is liay Allah hi kafi hay. Cz sari makhlooq us k ma tahat hay. Agar wo izat dena chahay to koi ruswa nae kar sakta agar wo ruswa karna chahay to koi izat nae dy sakta. Ye sari taqat mery or aap k rab ki hy. Is liay logon ko chayiey eik rab ki ibatad karien or usi ko apna dost or madadgar samjien. Us ki bandagi karo jis ny prophet ko beja na k us ki bandagi karo jis prophet ko beja. Ye sab batien us roshan kitab (Quran) mein saaf likhi gai hian. Mein khalis Allah hi ko madad gar samjta hon. us k siwa koi meri madad nae kar sakta. I know that balky sirf mein hi nae pori khalqat ye bat janti hy. bus sirf Dekhawy k liay log shrekon ko pukarty hain sirf daad hasil karny k liay khud b gumrah hoty hian or dosron ko b gumhrah karty hian.
By: khuram, Lahore on Apr, 08 2013
Reply
1
Reply
0
Reply
0
By: Salamath, Mysore - karnataka - india on Dec, 23 2010
Reply
0
By: ishrat iqbal warsi, Mirpurkhas on Nov, 16 2010
Reply
0
nice...........JAZAKALLAH
By: huba shakeel, karachi on Mar, 27 2013 MashaAllah What a beautiful way of Explaining Shirk and Tauheed.. May Allah bless you in this world and hereafter. Ameen..
By: Sultan Munir, Lahore on Sep, 29 2012 Assalam alaikum I need to know more and in detail about " KHWABOON KI TAABEER" in english. please if any1 has a soft copy of it please do mail me the same here;
[email protected] jazakallah Khairum
Mohtaram Iqbal Warsi Bhai, ye article may nay pehlay roman english may hi likha tha phir usay urdu may type karwa kar dobara banam SHIRK KISAY KEHTAY post kiya, or janab may abhi bohat junior hoo. Kamran Azeemi kay zubani aapki tareef suntay rehtay hain, aap say mil kar INSHA ALLAH boht kuch seekhnay ka moqa milay ga....
By: Shamim Ahmed, Karachi on Nov, 15 2010
Reply
0
By: ishrat iqbal warsi, Karachi on Nov, 13 2010
Reply
0
By: muddassir, lahore on Oct, 30 2010
Reply
0
nice.................SUBHANALLAH,.....................
By: ALI, karachi on Oct, 27 2010
Reply 0 Language: English Urdu
Post your Comments
Type your Comments / Review in the space below.
Submit Comments
Recent Religion Articles
Most Viewed (Last 30 Days | All Time)
MORE ON ARTICLES Featured Writers E-books Writers Club Interviews Novels
MORE ON HAMARIWEB TV Channels News Finance Islam Cricket Mobiles Videos Names Recipes Articles Poetry Photos Dictionary Health Weather Travel Results Directories