PhualvaTimes
tullou.tv | june 19, 2017 Posted on June 20, 2017 | Edited : June 20, 2017 at 7:55 pm
Singngat bialsung, Behiang PHC ah MANIRADA tungtawn a PHC a Solar thahatna ziak mei piakkhiakna ding zat theih dia bawl zoh ahihtoh kiton in tuni sunma in Bialtu MLA Ginsuanhau@GS Haupu, Chairman MAnireda Govertment of manipur in hongkhiakna nei in, Dr Steve Tungnung MO incharge makiah in MLA leh a team ten PHC a room tuamtuam etkhiakna nei uhi. etkhiakna neih zoh in PHC waiting Hall ah hun saulou zatna om a, Hiai hun ah Behiang PHC MO incharge in agenna ah damtheih lam toh kisai ngai poimoh mahmah Bialtu MLA te nupa hahpanna ziak a tuni a PHC a zat ding solar system honkhiak aom ahi chi a, Behiang PHC ah posting apan PHC puahpatna dia Bialtu MLA toh kithuzak den a panlak touh aom in, tuni Chiang in PHC etlawm tuah mahmah ban ah damlou ki-ensak dia ngak te ading in MLA Pi Nu ching in a tualdam tak a et theih a TV leh Skydish a leisakna tung ah kipahthu gen hi. Aban agenna ah Behiang PHC in masawn mahmah in mite kingahna tak hospital khat suak in ki-ensak Leng hundang sang a tamzaw in, siangthou na lam ah Swatch Bharat in 2015 kum in damtheihhuai pen leh hospital siang thou pen a, apuan ban ah Manipur pumpi ah PHC function hoihpen a chiam teh aom in Kalyakap 2016 award sang ahihdan gen in, PHC khantouhna dia nna sep ding tampi omlai a, natna tuamtuam testna ding in tulel in 10 vel omlel a, July ni khat apan test tuamtuam 57 om ta ding a, damlouna toh kisai a kithu Zak tuahna ding poimoh mahmah lai a Bialtu MLA in a ngahtuahsakna tung ah PHC staff te sik leh tang in kipahthu gen hi. Hiai hun ah Chinkhansiam Microcopist in a genna ah tuni a Singngat bial mipi te nu leh pa MLA pu leh Pi in behiang PHC hongphakna tung a PHC staff te kha Muang mahmah ka hi uh chi a, behiang PHC kum 22 val a upa hi a, Kum sawm val bang posting sung a singngat bial ah MLA pu ziak in khantouhna nasatak aom in, PHC renovation bawl ahihban ah Water reservoir leh quarter kining ching tak a apiakna tung ah kipah thu gen in, Behiang PHC in damtheihna lam toh kisai singngat bialsung mipi te adingin poimoh na liantak nei a, tukum bul January apan tuni tan in, hiai PHC ah damlou mi 1349 et in om a, hiai ten District Hospital naih ding uh hileh gari bahara maimai a leng Lakh 13 val bang seng ding ua, hiai te dawn jangkhia tu leh bial mipi te ading a kinepna PHC ahihman in a hoih zaw sem leh vanzat kining ching tak aomtheihna dia kaupeuh in apan la khawm chiat ding in chialna bawl hi.
Hiai hun ah Bialtu MLA GS Haopu in Behiang PHC, CHC a upgrade ding ahihman in, Operation theater OT room koih beh ngai ding a, huai ding a PHC mun kek let ding dan ngaih thuah hi ding chi a, Manipur ah PHC 85 val omna lak ah damtheih huai leh siangtou na lam ah Behiang PHC in khatna a lakna tung uah incharge Doctor leh staff te tung ah kipak petman ahihdan gen in, vanzat kining ching ban ah poimoh tuamtuam om te CM toh kithu zak a ngaihtuah hiding chi a, PHC a hoihzaw sem a puahthakna dia fund om thei bangbang ngaihtuah a Lakh 5 pia ding ahihdan leng gen hi. Behiang PHC ah room tuamtuam OPD Ticket Counter, Naunei na, naukapna, sisan testna, Minor OT, OPD, Ayush OPD, Pasal Ward, Numei Ward, Ultrasound kilakna, toilet leh Malaria Clinic room chih te oam ban ah Doctor leh Nurse te omna quarter 4 leng om hi. Tulel in Behiang PHC ah MO Doctor Incharge, Ayush Doctor tel in doctor 3, Staff nurse 5 tel in grade 4 khat om hi. MANIREDA in ahihleh Behiang PHC ading in home lighting System Solar plate 4, battery 4, light bulb 8 leh Street light 10 pia a, solar system tungtawn a PHC ah mei piak lut ziak in etlawn tuan mahmah in, mahni ki-etsakna ding room leng baihsam tak in theihtheih ding a, PHC ahihleh siangtou mahmah in ki-etsak te ding in leng damtheih huai mahmah hi. Tuni a Behang PHC a hun zat zoh in Behiang aom 26 Assam Riffle ten MLA pu kimuhpih in PHC a MO Incharge Doctor Steve Tungnung panlakna thupi leh kipahpih huai a sak dan uh MLA pu kiang ah gen uhi. XXXXXX Singngat khangthu adia MLA term nih kai zom, Ginsuanhau@GS HAupu Zou, Chairman, Manireda, Government of Manipur kipahpihna leh amah adia thumsakna tuni sunma in Jangnuam khua ah nei uhi. Kipahpihna hun zatma in Jangnuam khobul ah naupang ten MLA te nupa vaidawnna nei in, paak khi oksak ua, MLA pu ading in slogan saam uhi. Hunpi zatna Upa Mangchinkap in makaih a, Upa Khamsuanpau in hunpatna nei in, GT Zou in welcome address gen hi. Rev S Nengkhanmang in hasotna thu gen in, MLA te nupa ading in pathian kiang ah vualzawlna nget sak a, hun zat sung in P Tongthang, Special Contractor, Suanchinpau Guite, MDC lungthul leh MLA pu apan thugenna om in, Upa Khamminthang in kipahthu gen in, Rev Kamminthang in thumna in hunkhak hi. Hiai hun ah MLA Ginsuanhau Chairman, Manireda, government of Manipur in election term masa 2012 kum a bialsung mipi ten pathian kiang ah I thumna uh, pathian in hon dawng tou zel in, tu 2017 election hun ah telching in ki om nawn te hiai te tangtung sak pathian leh bialsung mipi te hi a, hiai te ziak a tuni a kipahpihna hun zang ahihdan gen a, election hun in mabang leh lungkiak hun om mah leh pathian muang kom a kal suan ding chih thupi a I neih ziak ua, I tup tang tung in, MLA kia hilou in, Manireda ah chairman bang kikai tou a, kipahna lian mahmah ahi chi hi. aban agenna ah mahni constituency chih om lou a constituency dangdang ah Manireda chairman khat hihna ah electric tunglouhna mun te ah solar tha zang a mei piak hi ding ahihdan gen hi. Gamsung leh nampi khantouhna ding in makai ten panla tou in, mi khenkhat in nampi politics kimawlna in zang ua, ei zosuan ten mahni hihna zumpih lou a, gamsung leh nampi khan touhna dia panlak theihna teng a panlak ding ahi chi a, behiang ah Police station leh Trade centre bawl pah ahihtheihna dia panla ding hihdan gen in, Jangnuam khau ading in kholutna lampi leh lei bawl sak hiding chi in, Singngat bialsung adia Jangnuam khua neupen nonlou ding ahihdan gen hi. MLA Ginsuanhau@GS HAupu Zou, Chairman, Manireda, Government of Manipur in tuni a behiang khau a zotna lampi ah Singngat khua gei a Tangpizol khristian naupang pawl KNP ten lampi ah MLA te nupa ana vaidawn in, pakkhi a oksak banah kipahpihna la sa ua, Tonjang Hausapi Nemching in leng amah inn ah MLA te nupa vaidawmna in singpi dawnpih hi. XXXXXX
District supply officer, Pherzawl District in NSFA antang April kha quata hawmna ding toh kisai in, Rationing Agent te theih ding in thusuah bawl hi. Huai dungzui in, zingchiang June 20 in Thanlon Sub division sung a Rationing agent ten CCpur godown ah zingkal dak 7 apan april kha quata ding NFSA antang la ding ua, June 21 in Parbung sub division a ding SDO/Parbung in la nawn ding uhi. Huailou in NFSA nuai a Rationing Agent leh SK oil Sub Dealer te hun March 31, 2017 ni a abei toh kiton in, Agent leh Dealer thak ding lakma SDO/parbung in mohpuakna la in, NFSA antang leh SK Oil te FPS Centre teng ah tuh a, government rate kipai dungzui a, a sangtu ding te kiang ah hawm khe ding in, A Tombikanta Singh, DC Pherzawl District in thusuah bawl hi. XXXX New Lamka West MDC CT lian Guite in mun tuamtuam a inn nei te toh pangkhawm a Inn a bawl te uh etkhiakna va nei hi. CT Lian guite in ahihleh sum lam a haksatna nei, Innmun nih nei khwm te ading in, Innmun khat pia in, aman ding tang in inn lam sak a, hiai in khat leh khat haksatna te kitha dawn tuah ban ah midang te adia panpih thu ahihdan CT lian in gen a, Inn mun hiai bang a inmun nih a inn lam zou lou te adia hiai bang nnasep a patkhiak ahihban ah Inn luah theih dia zoh siang ahihman tan Inn bawlna van leh tha man te CT lian in sen sak vek hi. Huai lou in inn bawl nuam ten leng CT Lian thuzak in mahni deihdan inn leh Budget gen in Inn bawlsak theih ding hi. XXX National Agro Tech Research and Processing Society (NARPS)/Livelihood Business Incubator (LBI) saina in tuni, June 19, 2017 sunma in DIC, Tuibuang ah a 8-veina, One Day Awareness Program on Apiculture & Mushroom Cultivation kichi neih in om hi. Hun zatna Joma Neihsial, Coordinator, LBI in makaih a, Joseph Vaiphei, Chaiman, NARPS in vaidawnna thu gen in, Y. Nabachandra, General Manager, DIC leh CEO, LBI in Training ding toh kisai putlakna nei hi. Paolal Haokip, MDC, Secretary, NARPS in hiai hun ah Training a tel dingte hanthawnna thu gen in training pat in om hi. Training hun ah Hussein Choudhary, Instructor, LBI in Mushroom Cultivating toh kisai sinsakna pia a, PC Thangchhuana, Supervisor, DIC in Apiculture (Honey Processing) toh kisai sinsakna pia in, hiai hun ah mi 20 vel kihel uhi. Livelihood Business Incubator saina mah in DIC Tuibuang ah gua leh chiing zang a khutsiam-silbawl kisinsakna pailel a, Tongthang Haokip in sinsakna pia hi. xxxxxxxx
Sumtuh Tualkuan/Tualsuah Committee saina in zan sunnung in Th. Chinzahau Inn, Chingkang’ Pa’ Avenue, Nehru Marg ah Sumtuh khosuak tutung a Class X leh Class XII exam a lohchinna ngahte kipahpihna leh thumsakna om hi. Hun zatna T. Tongkhomang in makaih a, Rev. T. Dongzadou in patna thumna nei in, lohchinna ngahte’n mimal kiputlakna nei uhi. Pastor Thangboi, SBC, Beulahlane in lohchinna ngahte’ adi’n thumsakna nei a, B. Dongzalian Simte, President, STC leh Chairman, Zomi Coucil apan leh Kamchinhau, Lecturer apan hasotna thu genna om in, gennop neite’ adia hun hon hi a, Pastor Th. Thangchinkhup, SBC, V. Munhoih in thumna in hun tawpna bawl hi. Sumtuh khosuak tukum in Class X ah student 18 leh Class XII ah student 14 in lohchinna ngah ua, Sumtuh khua ah nidang in inn 60 val om mahleh tu’n a tamzaw in siamsinna ngaih poimoh ziak in Khosung ah innkuan 50 phalou deuh om in, Lamka ah siamsinna ziak a innluah tamtak om uhi. xxxxxxxxx Ni 2 sung daih ding India gamsung a University tuamtuam kigawm in Education Expo 2017 kichi Synod Hall, IB Road a aneih uh tuni, June 19, 2017 in kipan hi. Education Expo ah Quest Group of Institution, Gulzar Group of Institute, GNA University, SGT University chihte apan palai hongpai in, a University uh toh kisai theihnuam neite houlimpih uhi. Hiai hun a hongpai University tuamtuam in North-East State apan kipan Student-te’ ading in hamphatna tuamtuam nei ua, Student pecent 85 tunglam mute Merit Scholarship apiaktheih ban uah, SC/ST Student-te adia Scholarship a saisak theih ban uah, hiai mun ah Director Admission leng bawltheih hi. Professional Course tuamtuam MBBS, BDS, Engineering, Nursing, Pharmacy, Physiotheraphy, MBA, MCA, Fashion Designing, Air Hostess, BBA leh a dangdang hiai University-te ah sintheih ding om a, Education Expo ahihleh zingchang sunma dak 11:00 apan nitaklam dak 5:00 tan daih ding hi. xxxxxxxxx State Institute of Journalism (SIJ), DIPR, Government of Manipur saina a ni 7 sung Basic Course in News Reporting kichi neih aom tuni, June 19, 2017 sunnung in zousiang uhi. Training ahihleh a paisa June 12, 2017 ni apan neihpat aom hi a, training hunsung Dr. Hangpi Manlun, Sothing Shimray, Awonshang Ningsen, Rupachandra Yumnam, Sapam Dilip leh Sobhabati Samon te’n thupi tuamtuam pansan in sinsakna pia ua, a ni tawpni tuni’n Field Visit nei in, training a tel te’n Field Visit a muhdan uh toh kisai Report pia in hun khakna zang uhi. Lalrongbawl Hmar, District Information Officer, Churachandpur in hiai hun ah training khakna nei in Training a telte kiang ah Participation Certificate piakkhiakna nei hi. 7-Day Basic Course in New Reporting ahihleh Director of Information & Public Relations, Government of Manipur saina a neih aom hi a, hiai Course a ding in Churachandpur apan mi 26 kihel uhi. xxxxxxxxx
Shyam Lal Poonia, IAS, DC Churachandpur makaih in tuni, June 19, 2017 sunnung din BRGF Resource Centre, DC Office, Tuibuang ah District Level Committee (DLC) Meeting om hi. Meeting hun ah District sung a Border Area Development Program (BADP) toh kisai Annual Action Plan (AAP) 2017-2018 genkhawmna nei ua, hiai hun ah Member paikhawm te’n behlap ngai omte toh kisai leng kikum khawm uhi. Meeting ah District sung a District Level Officer (DLO) hunkhop paikhawm uhi. BADP 2016-2017 nuai ah District sung ah Singngat Block ah nna 32 a ding sanctioned hi a, Thanlon ah 22 leh Sangaikot ah nasepna 9 sanctioned a om in, a kigawm in Rs. Lakh 439.47 sanctioned in om hi. xxxxxxxxxx Churachandpur Meetei Leikai Youth Club (CMLYC) saina in zan, June 18, 2017 in CMLYC Office Building, Khumujamba ah Voluntary Blood Donation Camp om hi. Hiai hun ah Dr. Vijayakanta Kshetrimayum makaih in Blood Bank, District Hospital apan staff te’n Doner-te apan sisan lakhia in, a poimoh bang in CMLYC in kithuah pihna pia uhi. Voluntary Blood Donation Camp ahihleh “The Great June Uprising, Unity Day” a 16-veina ahih toh kiton a neih hi a, hiai hun ah Phatuam Ngai a sisan thoh, numei khat tel in mi 30 apan sisan Unit khatchiat lakkhawm in om hi. “Gamgi omlou ding” chi a India Government leh NSCN (IM) pawl in “Bangkok Agreement” kichi June 14, 2001 ni a kithukimna suai akaih uh deihlou a kiphinna June 18, 2001 ni a neih aom sousang in, mipi khouhdaihna dia Security Force te’n thau a khahna lam ua kiphinna nei mi 18 kaplup a omte theih gigena dia kumteng June 18 ni “The Great June Uprising, Unity Day” chi a zat aom ahi hi. Voluntary Blood Donation Camp ahihleh NRHM, SBC Manipur in a sponsor ahi hi. xxxxxxxxx District Administration leh District Police kithuah a maban a International Yoga Day leh Churachandpur Marathon 2017 neih ding toh kisai tuni, June 19, 2017 sunnung in DC Office Chamber ah Press/Media Briefing om hi. Rakesh Balwal, IPS, SP Churachandpur in hiai hun ah United Nations Organization (UNO) in June 21 ni, International Yoga Day dia apuan toh kiton a District Administration leh District Police kithuah a zingkal dak 6:00 apan June 21, 2017 ni a Peace Ground Auditorium thupi tak a neih ding sawm aom ahih dan gen a, hiai hun damtheihna ngaihkhawk ziak a kuapeuh in uap a va kihel chiat ding in ngetna bawl hi. Hiai hun zatna Nehru Yuva Kendra (NKY), Churachandpur leh Pitanjali Yoga ban ah District Social Welfaire te’n leng kithuahpihna pe ding uh ahih dan gen hi. Aban a genna ah District Administration leh District Police in khotang a khamtheih doudalna toh kisai a Churachandpur Marathon 2017 kichi hong tung ding June 26, 2017 ni a neih ding sawm aom ahi chi a, hiai hun ah kihelte Category nih, Junior (Under 18 boys and girls) leh Senior (Open boys and girls) a khen in, Pasalte S. Kotlian apan Lamka College tan, Kilometer 10 leh Numeite K. Salbung apan Lamka College tan, Kilometer 5 tai ding uh ahih dan gen in, Registration bawl masa mi 300 kiang a T-Shirt hoihtak piak hiding ahih dan gen hi. Churachandpur Marathon ah kipahman mi 12 kiang ah asum a piak hiding uh chi a, a taitung masa mi 4 kiang ah Rs. 2,000, a zomtu mi 4 kiang ah Rs. 1,000 leh aban zom mi 4 kiang a Rs. 500 piak hiding uh chi a, a taitung masa mi 100 kiang a Certificate leh Medal piak hiding uh ahih dan gen hi. Marathon a tai teng Health Department in Free Health Check-up bawlsak thei ding ua, Live Music leng om in, sun hun a leng hun zatna tuamtuam om ding ahih dan gen hi. Shyam Lal Poonia, IAS, DC Churachandpur in Churachandpur Marathon 2017 kichi “Choose Life; Say No to Drugs” chih tupi zang a District sung khamtheih, tep-le-muam apan siangsak ding tupna a neih ding sawm aom ahi chi a, hiai hun mi atam theipen in uap dia chial in, Marathon a taite’ adia Traffic kimkhat awnsak hiding ahih dan gen hi. Lunglutna nei te’n SP-CCP office ah office hunsung in Rs. 100/- pia in participation form laktheih ding a, June 24, 2017 nitaklam dak 5:00 tan in form lakna counter ah piaklut theih ding hi. xxxxxxxx
Young Paite Association (YPA) General Headquarters a General Secretary Lianmuanthang Valte in thusuah abawl in a taklatna ah Unaunu (late) Chingzasiam w/o Kapkhankhual of VL Street, Vengnuam, New Lamka inn apan pawtkhia hun bangtan hiam zon ahih nung in apaisa July 18, 2017 ni in Suangnal/Tuaitengvum gam ah vangsiat huaitak in sisa a muhkhiak hi’n taklang hi. Lusun innkuante thuakih kawm in YPA New Lamka Block leh YPA Vengnuam Unit makaihna leh panlakna a Unaunu uh luang zonna a kalsuan Tribe leh Organization tuamtuam banah gari, nek-le-dawn, sum-le-pai leh a kul bangbang a kithuahpihna ana pete tengteng tung ah YPA GHQ in kipahthu gen hi’n taklang hi. Huai banah, phattuam ngaihna kong a pangkhawm thei zel ding in biak Pathian in hon vualzawl chiat hen chih deihsak thu taklang hi xxxxxxxxx Centre for Community Initiative (CCI) in hong tung ding June 24, 2017 sunma dak 11:00 in Malsawm Ability Resource Centre (MARC), Pearsonmun ah a 6-veina Unau Meet-cumInauguration of Malsawm Skill Development and Vocational Rehabilitation Unit (MSDVRU) kichi neih sawm uhi. Hiai hun Nemcha Kipgen, Minister (Social Welfare & Cooperation), Manipur leh V. Hangkhanlian, Minister (Agriculture, Veterinary & Animal Husbandry), Manipur te’n Chief Guest leh Functional President hihna toh uap ding uhi. xxxxxxxxxx Churachandpur District Badminton Association (CDBA) in a 17-veina District Level Badminton Championship 2017 hong dung ding June 27, 2017 apan neih ding sawm uhi. Championship kidemna ah numei leh pasal Mini apan kum 60 tunglam, Veteran tan in kikhen ding a, lunglutna nei te’n CDBA Office leh Kammin Badminton Store ah Entry Form la in, June 24, 2017 tan in pelut nawn thei ding uhi. xxxxxxxxxx WATCH VIDEOS
Post Views :: 1,557 Like 0
Tweet
Share
Tullou.tv News | May 31, 2017 (https://www.phualvatimes.com/tullou-tv-news-may-312017/)
CONNECT WITH US
Manipur Express | February 24, 2017 (https://www.phualvatimes.com/manipur-express-february24-2017/)
Manipur Express | July 30, 2017 (https://www.phualvatimes.com/manipur-express-july-302017/)
CONTACT INFO
[email protected] +91 8119040614
(http://facebook.com/ phualvanews)
SUBSCRIBE LATEST NEWS Email *
(http://twitter.com/ph ualvanews) (https://plus.google.c om/+PhualvaTimes) (https://www.youtube .com/user/phualvatim es/videos) © Copyright 2012 - 2016 PhualvaTimes - Information for All (http://www.phualvatimes.com/) · All Rights Reserved · Hand crafted with (http://www.naulak.com).
(http://www.naulak.com) by NWD